بۆ خەلیفە کەیخەسرەو ئیمامی
خاڵۆی سەر دەفتەر نازک خەیاڵان دیباچەی کیتاب ساحیب کەماڵان
پاک نە خەوش و خاڵ شێوەی نەفسانی پاک نە ڕای غەوسی گەیلانی
سهواد نامهی سۆرمه سات یاوا دڵ وه میلی مهیل وه دیدهم ساوا
بیناییم وه چهم باز ئاوردهوه مهرهده بێم دیسان ئه حیام کهردهوه
نازک خهیاڵ فکرو زکرو هۆش ئهو شهوق ئهو زهوق ئهو جۆش ئهو خرۆش
تەقریر و تەحریر هام فەردی هام فەرد جوانیم ویەرد گرد چەنی وێش بەرد
ئێستە پا بەستەی زنجیری پیریم سەرگەردان گێج دەریای دڵگیریم
ئیستدعا پەرێ دوعای خێر کەردەن منت نە جێگەی خاسان شمەردەن
من وێم مەزانو کام تۆمێم کاڵان یاران پەی هیمەت وەنەم مەلاڵان
یاری باری حەق باوەرۆ نە ڕێت سۆزی سەرمایەی عەقیدەکەی وێت
بەرۆن وە حزور بێ غەم و بێ باک بە گوفتاری پاک بەکرداری چاک
خاڵۆ من لافاو تەوانم بەردەن دوعام ڕای دەرگای قەبوڵ گوم کەردەن
جە یاران نەفەس بەرئاوردمەن بارۆ بە قیبلەی دوعا کەردمەن
تەن زەلیل دڵ دیل بەدەن عەلیلم چەمەڕای ڕاگەی ڕای عیزراییلم
ڕا دورەو و باریک مەنزڵ خارە و سەنگ بێ تۆشە و چرا بێ ڕەفیق دڵ تەنگ
مەر وەوە بۆی نەفەس خاڵۆی گیانیوە یا سۆزی پیری تاڵەبانیەوە
بۆ بەرون وەر نە ڕای گوزەر تەنگەن قافیەم تا قاف قیامەت لەنگەن
وەڵامی خەلیفە کەیخەسرەوی ئیمامی
خاڵۆکەی گیانی خاڵۆکەی گیانی ناز خۆی ناز خەیاڵ خاڵۆ کەی گیانی
بێ ڕەیب و ڕیا دور جە نەفسانی عیسەوی ئەنفاس بەحری مەعانی
شعرای سینە ساف گەنجینەی ئەبیات جەواهیر فرۆش بەخشەندەی نەجات
سەر مەستی ساف بادەی ڕۆی ((یوم و الاست)) دور جە واتەی نەفس پەلیدی سەر مەست
پەی نیکی هۆشیار پەی بەدی خامۆش مەی نۆش مەی فرۆش دەرون پڕ خرۆش
سەر حەڵقەی جەرگەی تاعەت گوزاران ئوستادی سەر مەشق دەرون ئەوگاران
نامەی پڕ سەفات وەڵام کیاستەن سەد شوکر للە ئاواتم واستەن
هیجران دوریت مەدۆ ئازارم خاڵۆ وە گیانت جە گیان بێزارم
تەماشی باڵای شۆخ شیرینت سکەی سەفوەت بەخش شەیبی نورینت
دیگ دەروونم ئاوردەن وە جۆش گا مات گا مەجزوب گا جۆش گا خرۆش
گا فەوت گا فانی گا سۆز گا نەجات هام نە خەوف بیم حەیات و مەمات
لێڵە وەهەر حاڵ سیروان نادا پەی هاوار وە ماڵم وەی وە یانەی وێم
هام بنە گەردە لول گێجی وەڵوەردا دو دەست وە حەسرەت مەدۆم وە سەردا
هام نە کەف و قوڵ قەڵوازەی سیروان توتیای فەرقم بەحری بێ سامان
ئاخم پەی فەردت ئاخم پەی دەردت ئاخم پەی حەسرەت هەناسەی سەردت
منبع: سایت کاک برهان بهزادی
